पानीपन

डाँडा र खोँचहरु

हराएर जान्छन् पानीमा जसरी

जसरी आउँछन्

हावा / वतासको अघि- अघि

फेरि उचालिएर तरङ्गमा

टिलिक् पिलिक्

रङ

र टलकहरु

टल्किन्छन् जसरी

नाच्दै- खेल्दै हातेमालो गरेर

थाक्दैनन् जसरी

दिनरात

मार्छन् साउती जसरी

स- साना केटाकेटीहरुलेजस्तो

भुलिदिन्छन् जसरी 

छिनकोछिनमै

धार र खोबिल्टाहरु

लाग्छ— उसै गरी

भुलिदिऊँ

नराम्रो-

भित्र राम्रो खोजूँ

आफू-

भित्र राम्रो बनूँ

रङहीनता-

भित्र रङ देखूँ ...

लाग्छ— पानी बनूँ,

मात्र पानी !

र जाऊँ

पानीकै

कञ्चन देशमा

जहाँ

भएर पनि

न डाँडा- खोँचहरु छन्

न उफान छ रङहरुको

न छन् धार र खोबिल्टाहरु;

छ त केवल—   

पानीपन ।